ဂျပန်နိုင်ငံတွင် မတ်လက လှုပ်ခတ်ခဲ့သည့် ငလျင်ကြီးအတွင်း ထိုင်ဝမ်၏ အကူအညီပေးမှုကို ကျေးဇူးတင်ကြောင်း ပြသည့် အနေနှင့် ဂျပန်နိုင်ငံသား ၆ ဦးသည် ဂျပန်မှ ထိုင်ဝမ်ထိ ရေကူးခဲ့ကြောင်း သိရသည်။
လေပြင်းတိုက်ခတ်ပြီး လှိုင်းထန်နေသော ပင်လယ်တွင် ၉၅ မိုင်ရှည်သော ခရီးကို ၎င်းတို့က ရဲဝံ့စွာ ကူးပြခဲ့ခြင်းဖြစ်သည်။ ခေါင်းတွင် ဆောင်းထားသော ရေကူးဦးထုပ်ပေါ်တွင် နှစ်နိုင်ငံ အလံများကို ရေးခြယ်ထားပြီး “ဂျပန်ကို ကောင်းချီးပေးသည့် ထိုင်ဝမ်အား ကျေးဇူးတင်ပါသည်”ဟူသော စာတန်းကို ရေးထိုးလျက် ထိုင်ဝမ်အရှေ့ဘက်ဆိပ်ကမ်း ဆွာအိုထိ ရေကူးကြခြင်းဖြစ်သည်။
၎င်းတို့ကို ထိုင်ဝမ်မှ ပြည်သူများကလည်း နွေးထွေးစွာ ကြိုဆိုခဲ့ကြသည်။ ရေကူးလာသည့် လမ်းတလျှောက်တွင် မီတာ အနည်းငယ် ရှည်လျားသော လှေငယ်များဖြင့် လူအချို့ လိုက်ပါလာကြသည်။ ၎င်းတို့ ကမ်းပေါ်ရောက်ချိန်တွင် မူလတန်း ကျောင်းသူ ကျောင်းသားလေးများက တံငါသည်များသဖွယ် ဝတ်ဆင်ကာ ဘင်ခရာ တီးဝိုင်းများဖြင့် ကြိုဆိုကြသည်။
ထိုင်ဝမ်သည် ဂျပန်ငလျင်ဘေးဆိုးကြီးတွင် ကယ်ဆယ်ရေး လုပ်ငန်းများကို အင်နှင့်အားနှင့် ကူညီခဲ့ပြီး ဒေါ်လာ သန်း ၂၆၀ ကျော်မျှ လှူဒါန်းခဲ့သည်။ မတ်လ ၁၁ ရက်နေ့က ဂျပန်တွင် ဖြစ်ပွားသော ငလျင်လှုပ်ခတ်မှုနှင့် နောက်ဆက်တွဲ ဆူနာမီရေလှိုင်း ရိုက်ခတ်မှုများအတွင်း လူပေါင်း နှစ်သောင်းကျော် သေဆုံးခဲ့ပြီး ရေဒီယိုသတ္တိကြွမှုကို လူတစ်သိန်းကျော် သက်ရောက်ခံစားခဲ့ရသည်။
No comments:
Post a Comment