တရုတ်နိုင်ငံတွင် ဗလာလက်ထပ်ပွဲဟု လူသိများသော အကျဉ်းချုံးလက်ထပ်သူ အရေအတွက် ပိုမိုများပြားလာကြောင်း သိရှိရသည်။
လူငယ်ပိုင်း များသည် ရှေးထုံးတမ်း အဆောင်အယောင်များကို စွန့်ပယ်ကာ အကုန်အကျ နည်းပါးစွာဖြင့် ကျစ်ကျစ်လျစ်လျစ်ပင် နှစ်ဦးသား ဘဝကို ထူထောင်ရန် စိတ်အားထက်သန်လာခဲ့ကြသည်။ အသက် ၂၆ နှစ်ရှိ ဝမ်ရှိုရီက ၎င်းနှင့် ဇနီးဖြစ်သူ ဇန်ဇင်းတို့သည် မင်္ဂလာဆောင်ရန်အတွက် လက်ထပ်စာချုပ် ဝယ်ယူသော ၉ ယွမ်သာ အကုန်အကျ ရှိခဲ့ကြောင်း ပြောကြားသွားသည်။
ဝမ်က မိမိတို့သည် ရှီဂျီဇမ်းရှိ ငှားရမ်းထားသော တိုက်ခန်းလေးထဲတွင်သာ နှစ်ဦးသဘောတူ လက်ထပ်ခဲ့သည်ဟု ဖွင့်ဟခဲ့သည်။ တော်လှန်သော အမြင်ရှိသည့် ခေတ်လူငယ်များသည် ဝမ်နှင့် ဇန်တို့ကဲ့သို့ပင် ဗလာလက်ထပ်ပွဲများကို လက်ခံလာကြသည်။ သူမ၏ မိဘများက ဝမ်ကို ကားတစ်စင်းနှင့် အိမ်တစ်လုံး တင်တောင်းစေလိုသည့် ဆန္ဒရှိကြောင်း၊ လက်ရှိတွင် မဖြစ်နိုင်သည့်အတွက် မိမိတို့၏ ဆုံးဖြတ်ချက်ဖြင့် သီးသန့် လက်ထပ်ခဲ့ခြင်းဖြစ်ကြောင်း ဇန်က ပြောဆိုသွားသည်။
ရိုးရာအားဖြင့် တရုတ်နိုင်ငံသားများသည် ထိမ်းမြားလက်ထပ်ချိန်တွင် ကိန်းကြီးခန်းကြီး အဆောင်အယောင်များ ခင်းကျင်းကြသလို လက်ဖွဲ့ပစ္စည်းများကိုလည်း အများအပြား တောင်းဆိုလေ့ ရှိကြသည်။ သို့သော်လည်း ယခုအခါ အထိုက်အလျောက် တတ်နိုင်သော တရုတ်လူငယ်ပိုင်းပင်လျင် အဆိုပါ ချဲ့ကားမှုများကို စွန့်ပယ်လာကြသည်။ ဗလာလက်ထပ်မှုများသည် ၂၀၀၈ ခုနှစ်နောက်ပိုင်း အင်တာနက် အသုံးပြုသူများ အချင်းချင်း ထိမ်းမြားမှုတွင် လက်ခံ ကျင့်သုံးလာကြသည်။
တရုတ်လူငယ် နေ့စဉ် သတင်းစာက လူငယ် ၃၂၀၀ ကျော်ကို စစ်တမ်း ကောက်ခံခဲ့ရာ ၄၃ ရာခိုင်နှုန်းက ဗလာလက်ထပ်ခြင်းများကို ထောက်ခံခဲ့ပြီး ၂၃ ရာခိုင်နှုန်းကသာ ဆန့်ကျင်ခဲ့ကြောင်း သိရှိရသည်။
No comments:
Post a Comment