အသက် ၁၃ နှစ်အရွယ် ကျောင်းသားလေး တစ်ဦးသည် ဗြိတိန်၏ အသက်အငယ်ဆုံး iPhone ဂိမ်း Application တီထွင်သူ ဖြစ်လာကြောင်း သိရသည်။
Apple ထုတ် iPhone တွင်ဆော့ကစား နိုင်မည့် ဗီဒီယိုဂိမ်း Application တစ်ခုကို အေရွန်ဘွန်းကတီထွင်လိုက်သည်။ Spud Run ဆိုသော ဂိမ်းကို ၎င်းက သူငယ်ချင်းတစ်ဦး အကူအညီဖြင့် တီထွင်ခဲ့ခြင်းဖြစ်သည်။ iPhone တွင် Application များ မည်သို့ဖန်တီး ရေးဆွဲရသည်ကို သူငယ်ချင်းဖြစ်သူ ဆီဘက်စတီယန် မက်နေးထံမှ ယမန်နှစ်အတွင်း လေ့လာခဲ့ပြီးနောက် ယခုဂိမ်းကို အေရွန်က ရေးဆွဲခဲ့ခြင်းဖြစ်သည်။
Spud Run ကို လာမည့်သီတင်းပတ်မှစပြီး ၅၉ ပဲနိဖြင့် ရောင်းချသွားမည်ဖြစ်သည်။
ဝင်္ကာပါ တစ်ခုအတွင်း သတ်မှတ်ထားသော အချိန်တိုလေးတွင် အာလူးများကို ဝေးနိုင်သမျှ ဝေးသွားအောင် ပို့ဆောင်ပေးရမည့် ဂိမ်းလေးကို မရေးဆွဲမီ ဆီဘက်စတီယန်နှင့် အေရွန်တို့သည် လိုအပ်သော အသုံးအဆောင်များ ဝယ်ယူရန် ပေါင်စတာလင် ၁၄၀၀ မျှကို စုဆောင်းခဲ့ရသေးသည်။ အသက် ၁၆ နှစ်ရှိ ဆီဘက်စတီယန်က ဂိမ်း၏ စိတ်ကူးစိတ်သန်းပိုင်းနှင့် ဖန်တီးမှုပိုင်းကို တာဝန်ယူပြီး အေရွန်ကမူ နည်းပညာပိုင်းကို စီစဉ်ဖန်တီးခဲ့သည်။ ယင်း တို့သည် သူငယ်ချင်းများ၏ ကွန်ပျူတာများကိုပါ အသုံးပြုပြီး ဂိမ်းကို ရေးဆွဲခဲ့ကြခြင်းဖြစ်သည်။ ယမန်နှစ်ကလည်း အမေရိကန်မှ အသက် ၁၄ နှစ်အရွယ် ရောဘတ်နေး၏ ရူပဗေဒ အခြေခံ ဉာဏ်စမ်းဂိမ်းလေးသည် Download ရယူ ဆော့ကစားသူ ၂ သန်းကျော်ခဲ့ပြီး နာမည်ကျော် Angry Birds ထက် လူကြိုက်များသည့် ဂိမ်းလေးအဖြစ် ရပ်တည်အောင်မြင်ခဲ့ဖူးသည်။
No comments:
Post a Comment